السلام عليكم ورحمة الله وبركاته
اخواني / خواتي .. شباب الكويت ، نبض الكويت ، مستقبلها .. املها ..
تذكرون هالشريطه ؟
هالشريطه لبسناها من ١٨ سنه يوم انه كنا انطالب باسرنا عسى الله يرحمهم وينور قبورهم ..
تدرون ليش كانت صفره؟ لان الشريطه الصفره تمثل الامل
اليوم، بنرد نلبسها،
بنرد الامل فينا انه الكويت ترجع مثل ما كانت واحسن ..
بنرد الامل فينا انه نكون مثل ما كنّا على قلب واحد ..
بنلبس الشريطه الصفره عشان نقول عندنا امل .. وبنغيّر !
لانه يا جماعه احنا يا شباب هالديره لي فقدنا الامل، ترا بنفقد كل شي
..
ماعتقد انه اي واحد فيكم مو عارف شاللي قاعد يصير بالبلد .. يتراولي انكم قبل لا تسمعون كلمة فساد من فلان وعلنتان .. تراكم عايشينا، فما جيتلكم اليوم اتكلم عن الفساد وشنو صاير، لانه كلنا عارفين ..
جيت اليوم اقولكم
بنغيّر
ــــــــــــ
شلون ؟
خلوني ابدي كلامي بقصه صغيره شرايكم ؟
بيوم كنت قاعده بيمعة بنات ، ضحك وسوالف ونقاشات ، منها المفيد ومنها اللي لا يودي ولا ايّب
المهم،
دشينا بموضوع الانتخابات ، ودار الحوار بيني وبين جم بنيه ..
من له بتصوتين ؟
فلان الفلاني
شمعنه ؟
يصير حق ابو بنت خالة رفيجتي
همم، اوكي
انزين وانتي مرزوقه، من له بتصوتين؟
فلان العلنتاني
شمعنه ؟
من قبيلتي
اها، اوكي
وانتي حجيه؟
والله شوفي انا بصوت حق اللي يبيع
فنانه !
انزين وانتي فتحيه؟ من له بتصوتيّن؟
فلان الفلانتاني
اها، شمعنه؟
لانه خوش واحد
شلون يعني خوش واحد؟
يخدم الناس، مصلي، مسمي
هذا مو كان عضو؟
امبلا
شسوا لما كان عضو؟
وايد اشياء
مثل؟
منع نانسي عجرم انها تغني بهلا فبراير
مشالله ! .. لا فنان !
انزين وانتي ام تحسين؟ صوتج من له؟
لا انا ماراح اصوت
افا، ليش؟
محد يستاهل
وانتي شدراج، شفتي البرامج الانتخابيه وسمعتي كل مرشحين دائرتج؟
لا بس كلهم حجي
يا بنت الحلال لا تجمعين، انه بعض الظن اثم، ولا تنسين انه الرسول عليه الصلاة والسلام قال (الخير فيني وفي امتي إلى قيام الساعه) وبعدين مايصير تحكمين وانتي ما سمعتي الكل ولا قريتي برامجهم الانتخابيه
ــــــــ
مابي اقولكم اني انصدمت بالردود لانه خنكون واقعيّن، هذا اللي قاعد يصير .. مو عدل ؟
كل ما سألت واحد من له بتصوت، قالك فلان وعلنتان واسبابهم كل واحد اتفه من الثاني، لا مبنيه لا على منطق لا فكر لا عمات عين ..
انزين وبعدين !؟
اذا انته بتصوت حق ولد عمك وذاك بيصوت حق اللي يبيع و و و .. ؟! والتالي؟ شراح يصير !؟
وتبون التغيّر !؟
والله جد !؟
شلون تبي التغيّر وانته هذا فكرك !؟
ما علينا ،
خلصوا الحجي اللي عندهم،
وكان ردي لهم كالآتي ..
انتي يا هلّي بتصويتين حق اللي يصيرلج،
لي وصل البرلمان، انتي شراح تستفيدن؟
انه والله واحد يصيرلي عضو؟ نظام بتفيخرين جدام الناس انه اللي يصيرلج صار عضو؟
هاذي الفايده، مو؟ يعني فايده شخصيه، لا اكثر ولا اقل ..
صح، هذا لي وصل البرلمان بيفيدج انتي ويفيد اهلج، صح ما قلنا شي، بس هل انه هالنائب اللي لي وصل البرلمان، بيمثلج انتي واهلج والسلام؟!
يا بنت الناس، العضو اللي يوصل البرلمان يمثل مو اقل من ٥٠ الف فرد من الشعب !
انتي واهلج جم؟ ٣٠ ٤٠ ١٠٠ ٢٠٠ ؟ انزين والالاف الثانيه شبيستيفيدون ؟!!
الكويت ! شنو بتستفيد !؟
شراح يسوي !؟
شراح يقدم حق هالبلد !!؟
فكري فيها شوي قبل لا تاخذين قرار !
نفس الحجي يا اخت مرزوقه، ولد القبيله مالج، شبيسوي حق الكويت؟ شلون بيغيّر ؟
وانتي يلي بتبيعين صوتج، والله جد !؟
تبيعين ديرتج بالف والا الفين؟! لا وفلوس حرام بعد!
تبيعين ضميرج بالف والا الفين !؟
تبيعين التغيّر ! بالف والا الفين !؟
بتقوليلي صوتي شنو بيأثر !؟ اقولج اذا انتي قلتي صوتي شبيأثر وغيرج قال نفس الحجي، شبنوصله !؟
هل اذا انتي كفرد مسؤول عن امانه قلتي "انا صوتي شبيأثر" .. بنغيّر !؟
تبي التغيّر ؟! كون التغيّر !
شنو يعني فرد مسؤول عن امانه !؟
يعني سلمك الله صوتك مو لك !
صوتك امانه من رب العالمين .. راح اتحاسب عليها يوم من الايام ..
يا جماعه لا تنسون انا الله يعلم ما في القلوب ..
صوتك امانه ! مو من حقك تلعب في على كيفك !
وتعال هاللي بتصوت حق المرشح كونه "خوش واحد" ..
آمنه بالله،
خوش واحد .. يزاه الل خير
شنو عنده يقدم حق البلد؟ هالخوش واحد وين حدود عطائه ؟ منطقيته ؟! شنو عنده افكار يفيد فيها البلد ؟
والا بس "خوش واحد" والسلام؟
خوش واحد حطه مدير ! خوش واحد حطه رئيس قسم !
مو والله خوش واحد يالله خنحطه يمثل ٥٠ الف من الشعب، وفكره محدود !
دام انه فكره محدود فهو غير صالح لكرسي البرلمان !
هالكرسي يبيله واحد عنده فكر ، عنده شي يقدمه حق الكويت !
" مصلي، مسمي " ..
نفس الشي، مصلي مسمي على عيني وعلى راسي، عسالله يحفظه ويثبته، لكن شنو عنده حق الكويت ؟!
حدود فكره وين؟ شنو عنده مشاريع يقدمها حق هالبلد ؟!
"يخدم" ..
شنو يعني يخدم !؟ يعني نوعه ياخذ معاملتك ويراكض فيها من مكان لي مكان !؟ ما يقصر مو !؟
ما يقصر بالواسطات ! عدل !؟
انزين هذا اللي ما يقصر وياك، وليه حتجت علاج حطلك اكبر الواسطات ووداك احسن المستشفيات بالعالم ..
شاللي اولى ؟
انه يفيد٥٠ واحد ويطرشهم حق احسن المستشفيات
والا انه يعدل مستشفياتنا ويخليها تصير من احسن المستشفيات تستفيد منها انته وغيرك آلاف مؤلفه من عيال الديره ؟!
..
لا وفي ناس توريهم انه فلان الفلاني زين وتنطبق عليه كل المعاير وراح يفيد الكويت ويفيد الشعب وعنده افكار ومتحدث وبرنامجه الانتخابي واضح ومنطقي وذكي ..
يقولك لا ماصوتله
طيب ليش؟
والله سني/ شيعي / بدوي / حضري
نعم؟! بالله هذا مقياس !؟! شنو يعني سني والا شيعي والا اسلامي والا لبرالي والا قدساوي والا عرباوي !!؟
مو راح يفيد البلد !؟! مو بيوصلك حق التغيّر اللي انبح صوتنه واحنا اناشد فيه !؟!
عاد شعليك جانه شيعي والا سني !؟!
دامه بمصلحت الكويت وبمصلت التغيّر، صوتله !
ما عليك ! سني / شيعي / اسلامي / لبرالي .. الخ
! منو ما كان يكون
دام تنطبق عليه كل المعايّر .. حط ايدك بايده ! في سبيل الكويت وفي سبيل التغيّر !
ــــــ
لا شك انه الاغلبيه الحين قاعدين يتسائلون ، شنو المعايّر اللي على اساسها اختار المرشح الاكفئ عشان يمثلني ويفيد الديره ..
انا اقولك ..
اول شي .. اذا كان المرشح عضو سابق
شوفوا هل انه سبق له وصوّت ضد مصالحكم بالبرلمان؟
يعني مثلا: الدوائر الخمس .. هذا كان متطلب شعبي، ناشدوا في كل اهل الكويت،
فاذا كان في واحد مصوّت ضد الدوائر الخمس بدون سبب وجيه ومنطقي، معنى جذي انه هذا ضد مصلحت البلد، لا تصوتله ..
ثاني شي .. هم اذا كان المرشح عضو سابق
شوفوا .. هل انه طرح بالبرلمان قضايا تهم البلد ؟
هل كان له موقف في التغيّر الى الافضل ؟
والا كانت سوالفه، ليش نانسي عجرم غنت؟
ليش يبيعون ورد احمر بالفلنتاين ؟
الحين حاطينك ورازينك وعضو وحالتك حاله، تقولي ليش نانسي عجرم غنت !؟
والله جد !؟
الحين هاد الاكو والماكو وقاعد تقولي ليش نانسي عجرم غنّت ؟!
الديره مافيها ماي! وانته تقولي ليش نانسي عجرم غنّت !؟
فسلمكم الله، هذا اللي نسه القضايا المهمه بالبلد وياك يناقشك باتفه القضايا، هَم لا تصوتله
ثالث شي ..
لما ايّك مرشح ويسوي ندوه ودعوه وحضور وعشه وحالته حاله .. ويقعدك جباله ساعتين واهو يهذر عن المشاكل اللي صايره بالبلد وانه شلون الفساد عام وبالديره وانه تعليمنا يفشل ومستشفياتنا تبجي وغلاء الاسعار ... الخ
يقعدك ساعتين واهو يتحجا عن الفساد اللي صاير !
اي مو ندري !! مو شي يديد !! ندري انه الفساد ذابحنا ! احنا عايشيّن الفساد ! ندري انه مستشفياتنا تبجي ! ندري انه تعليمنا يفشل ! ندري! والله ندري !
اللي مانعرفه اهو انه، شالحل !!؟
هذا اللي ابي منك ! مابيك تقولي شنو صاير بالبلد ! لانه انا وياك وكل مواطن عايش على ارض الكويت عارف انه الفساد ذابحه، اللي مانعرفه انه شنو الحل !؟
شنو الـ
action plan
مالك ؟!
قولي والله التعليم خارب بالبلد وانا بصلحه وفقاً لكيت وكيت .. حطلي شلون بتصلح !؟ حطلي القوانين اللي من خلالها ناوي تصلح .. حطلي مواد من الدستور اللي على اساسها تقدر تصلح .. حطلي خطه واضحه اشوفها جدامي ! وتعهد بانك اتطبقها .. ابي اعرف بالضبط انت شبتسوي لي وصلت عالكرسي ؟!
عطني
action plan
عطني 1 2 3 !
مو تقولي والله التعليم فاسد وانا "سأسعى جاهداً لاصلاحه" وتسكت .. لانه ملينا من الحجي ملينا من الشعارات اللي لا تودي ولا تيب !!
قولي شلون تسعى لاصلاحه !؟ شبتسوي !!؟
رابع شي ..
مثل ما قلت توه، شالفايده من "خوش واحد" وفكره محدود !؟
شوف منو عنده فكر، منو عنده منطقيه منو عنده طرح جيّد ؟
الفكر والمنطقيه والطرح السديد من اهم معايّر عضو البرلمان،
تبي واحد يكون فاهم واعي، عنده افكار عنده منطق، يعرف يطرح المواضيع باسلوب راقي واضح .. عشان يكون لمصلحت الكويت .. مصلحت الكويت تبي انسان عارف شقاعد يسوي .. مو والله عطاك اللي عنده وسكت، هذا يكون فكره محدود، مايصلح يكون نائب ..
هذا هم يطبق على المرشحين اللي كانوا نواب سابقين، شوف حدود فكره وين؟ هل انه لا والله فكر وسوا وحط ولازال
والا فكر واشتغل على فكرته وبعدين سكت؟
والله اذا انته جربته وشفت انه امكانياته وقدراته متواضعه .. لا تصوتله
خامس شي،
لا تنتخبون شرايّن الاصوات، لانه تآكد هاللي يدفع "ملايّن" عشان يوصل عالكرسي، تراه مو عبيط، بيردها اضعاف مضاعفه لي وصل، ومعنى جذي انه بيتشر الفساد بالديره، يعني لا طبنا ولا غدا الشر ..
وانا ما اقولك لا تصوّت حق ولد عمك، ولا اقولك لا تصوّت حق ولد القبيله، اذا كنت شايف فيه الميزات اللي قلتها فوق، صوتله !
انت لما تصّوت صح، ترا مو قاعد تصّوت حقي والا حق المرشح ولا اهله ، انت قاعد تصوت حق نفسك ! حق مستقبل عيالك .. حق الكويت ! حق التغيّر !
اليوم انت عايش،
فساد مو فساد، عايش!
باجر لي صرنا ٧٠ مليون، شلون بنعيش بالله ؟! شلون بنعيش واعضاء البرلمان اللي انته مصوّت لهم قاعدين يتحجون عن نانسي عجرم ليش غنّت !؟
شلون بنغيّر، وفكر المرشح اللي اخترته محدود !؟
يا جماعه اذا الحين عندنا ازمة ماي وكهربا، باجر لي صرنا نفس مصر ٧٠ مليون ادمي ، والله لا انه بنطر الخبز طر !
يا جماعه، بس ! .. ملينا .. متنا !
الفساد وصل حده ! لامن تعليم لامن متسشفيات لامن اقتصاد .. الخ
.. بس !!
قاعدين نموت !
يا جماعه هذي فرصتكم، غيروا الحين ! والا ترا اذا ما غيرنا الحين بحياتنا ماراح نغيّر .. !
اسمحولي بس اقتبس مقاله من الكاتب / فؤاد الهاشم ..
اقروها !
عدل كلامه .. !
لانه الحل اليوم بايدك .. لا تيني باجر اتحلطم !
موقفك انت بيأثر ! اي والله بيأثر ! .. حتى لو ما كنت فوق الـ٢١ .. هم تقدر تاخذ موقف .. بالضبط مثل اللي انا قاعده اخذه الحين .. انا للحين ما صرت ٢١ سنه .. بس صرخت بكلمة الحق .. وانت بعد نفس الشي .. لا تسكت !
قول، بنغيّر !
يا جماعه كويتنا انقلبت فوق حدّر !
يا جماعه وين كنا ووين صرنا !؟
يا جماعه والله الوضع يبجي، والله !
احنا ياهاللي كانوا يسمونا درة الخليج، وين وصلنا !؟!
صرنا بالحضيض !
يا جماعه ديرتنا ! يا جماعه عيالنا ! يا جماعه مستقبلنا ! يا جماعه حاضرنا ! يا جماعه الكويت !!
تكفّون ! تكفوّن ! تكفوّن !
الكويت !
قال الله عز وجل ( ان الله لا يغير ما بقوم حتى يغيروا ما بأنفسهم )
ولا تقولي انه اهي خاربه خاربه!
فـ نعيب الزمان والعيب فينا ! وما لزمننا عيب سونا !
لا تستلمون حق هالوضع !
لانكم كما تكونوا يولى عليكم !
واعرف ان جانك تبي التغيّر، تراك بتغيّر !
مثل ما بغيناها خمسه وسوينها خمسه ، اليوم بنغيّر وبحيل الله راح نغيّر !
انا وياك وكل شباب الكويت !
جاني بديتها، انته بتكملها
هذا كلامنا .. هذا اللي نبي .. احنا يا شباب الكويت .. احنا يا نبض الكويت ومستقبلها !
وانته ويانا !
كلنا لها ! كلنا حق الكويت .. ! كلنا تقول بالصوت الواحد .. بنغيّر !
وراح نغيّر .. بحيل الله واب ايرادتنا راح نغيّر !
راح نرد الكويت ! بنرفعها ! .. وتكون احسن من قبل !
they call it hope
ماراح نفقد الامل انشالله !
لانه احنه شباب الكويت احنا نبضها احنا املها .. اذا فقدنا الامل .. فقدنا كل شي !
كون واحد مناّ .. كون ويّانا .. البس الشريطه الصفره اليوم وقول بنغيّر !
حطها بتوقيعك .. علقها بسيارتك .. حطها على صدرك .. اب موقعك .. اب مدونتك
قول حق الناس انك الامل ! انك واحد من نبض الكويت .. قول لهم انك بتغيّر !
قوم روح اشتر شريطه من الجمعيه ، ترا ماراح تكلفك شي، لفها جذي والبسها .. كون واحد مناّ !
كون من شباب الكويت .. كون من اللي يغارون على مصلحت هالديره .. كون مستقبلها .. كون املها !
___
ما ينالكم اليوم عشان انافس غيرنا .. ولا ينالكم عشان نبرز نفسنا وعمرنا ..
مايّنالكم باسامينا .. ينا باسم نبض الكويت ! باسم امل الكويت باسم شباب الكويت .. باسم التغيّر !
ينالكم اليوم نحط ايدنا بايدكم .. انتوا يا شباب الكويت
قلنا كلمة حق .. بدينا فيها .. ووياكم بنكملها !
حق الكويت !
لانه .. بنغّير !
52 comments:
معكم قلبا و قالبا
ما اختاروا الأصفر عبث
فعلاً يبعث على الأمل :)
انا ما اصوت لكن الله يوفقكم
على فكرة
ترى الموضوع مع انه يستاهل
طويل شوي
موفقين
;,dبكل بوست احط هالكلام وياما نطقنا
بس راح نوقف وفي امل
بس ام تحسين وماادري منو كويتيات ؟؟؟ ومرزوقه صارت اتصوت :p
بس عندي نقطه لا تستشهدين بكاتب مثل شاكلة فؤاد الهاشم
يعطيج العافيه
I'm with you in every letter you said.
exzombie
يزاك اللخ خير
ولد الديرة
مايخالف ياخوي، انت قلتها يستاهل
اجمعين انشالله
eng_q8
خلك من امتحسين وربعها ;p
كلها اسماء مستعاره ;p
وكوني اقتبست مقاله من مقالات الكاتب فؤاد الهاشم مو معناته اني اتفق وياه كشخصه ، لكن الريال قال كلمة حق بالمقاله اللي اقتبستها ، حبيت انشرها عشان اوصل كلمة الحق
نصيحه ياخوي / كونك ماتتفق ويا انسان مو معناته انه كل اللي يقوله غلط
شخصيا، اخلف وايد ويا الكاتب لكني اتفق معاه بالمقاله بالذات
عموما، يعافيك اخوي، ما قصرت
fayoora,
im glad you are, thanks dear
God bless you 3ala hal post. I agree with everything you said. ilnas dayman yit7al6mon 3ala ilfasad wilmoshkila ina they themselves are contributing to this fasad. Kil wa7id yifakir ib ma9la7ta ka fard moo ib ma9la7at ilmojtama3. Their self-interest is wat drives their choices. Moo mistaw3ibeen ina ib hal sowalif lo 7a6aw ma9la7at ilmojtama3 jidam ma9la7at-hom ilsha59iya, ildeera ibtitsana3. Like u said, kilman bigool ina 9ota 9ot wa7id oo mara7 yi2athir. Bil3aks, bi2athir. One hand can't clap alone. Ppl want change, but they're not changing themselves. They shud take action and not wait for a miracle that's never gonna happen. As Gandhi said: Be the change you want to see in the world.
I hope ppl yistaw3ibon hal shay soon. Allah y7afith liKuwait oo sha3b liKuwait inshala.
i love this blog ur VERY rite lelasaf wayed nas matfakr ela ibma9ale7a o el Kuwait is goin down ma7ad 7as feha !!
keep goin sweetie o enshalah 9otich o afkarich TO9AL for eveyrone :)
god bless kuwait
o enshalah neshoof majlis elmembers elly feeh ye7eboon elkuwait or ye3rfoon sheno ya3ni kuwait
خوش اقتراح
لكن الموضوع اعمق من الأمل و يبيله عمل
shoush,
اللهم امين ، thanks sis, kalamich kila 3adil
~ Lush,
y6awily 3omrich, enshalh hal sot maykon bas soty bro7y, bykon sot shabab lkwt kilhom
hussain,
اللهم امين , thanks bro
kil ma6goog,
اي مو احنا شقادين نقول ؟ نبي نغيّر ! اب موقفنا بنغيّر .. انا ما قلت اللي قلتا لمجرد الامل ، كان في تحرك بالموضوع .. يجب على الكل تبني .. هذا اهو العمل وانا اختك .. انك توصل هالجم كلمه حق اكبر عدد ممكن من عيال الديره .. انه بيوم ١٧/٥ تكون هالكلمه اثرت فيهم وصَوتوا حق مصلحت الديره، هذا بحد ذاته اهو العمل اللي عليك كفرد ، هذا وانا اختك اهو الواجب
معاكم
كثر الله من أمثالج
و بنغير إنشالله :)
ابي انااام وواقعد من النوم واشوف 50 عضو اول مرة اشوفهم ينسوني اشكال الي قبلهم ..... باااااااي دخت بنااام
وبصراحه ختماه مسك مع البلوغ الحلو والبوست الأحلى معكم قلبا وقالبا ومقلوبا
الله يعطيكم العافيه
و يزااااااااكم الله خير
بنغير ان شاء الله :))
موفقين للي فيه خير الكويت
الله يعطيكم العافيه
يوم الإقتراع سيكون هناك تغيير ولكنة ليس للأفضل
يعطيك العافية
يعطيج العافية
اتفق معاج بالكلام و اتنمى انه يوصل لأكبر قدر ممكن من الناس
عين العقل كلامك
انبح صوتى و انا اقول حق اهلى
اللى بيصوت لان زين
و اللى لان عم فلان
مصيبه
لكن
بنغير
اكيد
ان شاءالله التغيّر موجود
ان الله لا يغير ما بقوم حتى يغيروا ما بانفسهم
خلنا نعدل نفوسنا اول شي وعقبها بيتعدل كل شي ان شاء الله
انا وياج بكل اللي قلتيه وعسالله يعطيج العافيه ويكثر من الشباب امثالج
بس عندي اعتراض على الشريطه الصفره ... ليش ما نغير لونها؟؟؟
مثل ما قلتي في بداية البوست "هالشريطه لبسناها من ١٨ سنه يوم انه كنا انطالب باسرانا عسى الله يرحمهم وينور قبورهم .."
ما نبي يصير في مشروعنا مثل ماصار فيهم الله يرحمهم... شوفي لنا لون ثاني أحسن
enter-q8
قواك الله ياخوي ، انشر هالكلمه وانا اختك .. حط الشريطه الصفره اب مدونتك وقول بنغيّر .. خل اكبر عدد من الناس يقرون اللي مكتوب .. وصل الكلمه والبس الشريطه الصفره
هالحمله محتاجه فزعت شباب الكويت .. باسمكم بديتها .. وانتوا بتكملونها .. بروحي ماراح اقدر اسوي كثر اللي نقدر نسوي كمجموعه
كونوا وياي بكل اللي تقدرون عليه
بوتشخيص
يطولي عمرك اخوي، تسلم
مثل ما قلت حق اخوي (انتر كويت) كون معانا .. قولها للناس .. البس الشريطه الصفره وقول بنغيّر
q8yeen
انشالله الحلم يتحقق .. وانغيّر .. ماراح نفقد الامل .. ماراح نتمنى ونسكت
بنغيّر
قلب طفله
يعافيج ويبجيج ، يزاج الله خير
نفس الشي، كوني معانا
هذيان
يعافيك ويبجيك
كون ويانا
حسافتج يا كويت
انته الامل معدوم عندك موليه،
وبس؟ هذا اللي نقدر عليه؟ انتحلطم وانقول حسافه؟ وانحط ادينا على خدنا وانقول راحت علينا؟
خلاص؟ فقدنا الامل بديرتنا؟
احنا يا شبابها بس بنتحسر وانتحلطم وبس؟
لا يا خوي، مو هذول اللي بغوها خمسه مو هذول مستقبل الكويت .. مو هذول شبابنا
احنه اللي بغيناها خمسه
احنه اللي بنغيّر !! بحيل الله
الامل فينا ماراح ينطفي .. تفائل وانا اختك .. افيد لك
mtfa2el
لا تمنى وتسكت وانا اختك .. كون ويانا .. وصله حق اكبر قدر ممكن من الناس
علي نفسها جنت براقش
كفو والله، لبسي الشريطه الصفره ياختج .. وقولي بنغيّر .. وصلي الكلمه
7soon
بارادتنا وعزيمتنا وشغلنا وتحركنا .. بنغيّر
كون ويانا
فتى الجبل
وهذا اللي قاعده اقوله وانا اختك
خنعدل!
يا ريت نرد تقرى شاللي مطلوب ، المطلوب انه نغيّر من نفوسنا .. المطلوب انه نقول حق كل الناس انه بنغيّر .. عشان يكونون ويانا ويغيرّون !
marine
تسلم اخوي ماتقصر .. الشريطه الصفره وانا اختك تمثل الامل .. وبخصوص اسرانا الحمدالله في بعضهم رجعوا .. وقدر الله وما شاء فعل .. بس مو معنى جذي انه نفقد الامل
ومثل ما قتلك معنى هالشريطه بالذات اهو الامل .. اللي بحيل الله محنا فاقدينا
لا توصين يا اختي قاعد اسوي لوجو حق هالشغله من امس و بمقاسات مختلفه ان شاء الله تلاقينهم بايميلك اليوم
الرجاء ارسال رسالى فارغة على ايميلي
enter-q8@msn.com
كثر الله من امثالك ياخوي
يزاك الله الف خير
علشان الكويت ، الكل نغيّر .. !
كلنا وياكم بإذن الله :)
http://www.starbucksq8.net/vb
كلنا نبي نغير
و عسى الله يوفقنا و يحفظ لنا الكويت
A very good post.
I totally agree with the subject.
I think instead of "We want to change" we should say "We're changing" because your post is one of the changes to a better Kuwait & so far u have 30 comments on your post That is equal to 30 agreements to participate in the change. So in simple math i think that (if you count the people who do good things but not speak of it) There are thousands of Kuwaitis working on them selves changing their believes & visions.
I really thank you for your post. You're a great Patriot i hope.
together 4 better kuwait ;)
إذا بعض الألم باقي ..
ترى بعض الأمل ماراح :)
برافو عليج
بنغير
عشان .. لازم نغير
يعطيها العافيه اللي كتبت هالكلام المعبر، و ان شاء الله صوتها راح يوصل لأكبر شريحة من الناس و الكل راح يفكر مرة ومرتين بكل حرف مكتوب قبل لايعطي صوته لاي أحد كان ويخلي مصلحة الكويت فوق كل اعتبار.
اخواني من هالجيل احنا مالحقنا على الكويت أيام ما كانوا اهلها مترابطين وعلى قلب واحد، اسالوا أي شخص كبير عن الكويت قبل 30 او 40 سنه وشوفوا شنو يقول لكم راح تستغربون من الي تسمعونه ويمكن تقولون هالشايب مخرف
(كانو الكويتين عائلة وحدة)
محد كان يقول انا حضري أو انا بدوي أو انا سني أو انا شيعي، الكل كان يقول انا كويتي
اتمنى هالايام ترد ونعيش كلنا متحابين ويد واحدة من أجل كويت المستقبل
يا جماعة ترى الصوت مسؤولية يحاسب عليها رب العالمين، فل نعطي اصواتنا لمن يستحق.
معاكم .. و عسى الله يوفقكم
بصـراحة شي يرفع الراس وفعلاً بأسم شباب الكويت الواعي .. من أجل التغير
بنغّــير ولي الشرف إني اكون وياكم
وهذا تصميم هديه اتمنى يعجبكم =)
http://www.flickr.com/photos/pcioo/2460688639/
اخوكم عيسى الشيخ
المشكله في سالفة الدوائر
اللي انا ابي اصوت لهم كلهم مو في دائرتي! كلهم للأسف برا الدائره، و اللي عندنا بالدائره اغلبهم عندهم توجهات انا ضدها تماما، والباجي ممكن يسنعون شي بس يخربون على شي ثاني، و اخاف اعطي هالمرشحين صوتي علبوا يسنع بالشي الفلاني باجر لو يسوي شي ضد اقتناعاتي راح احس اني لي ايد في توصيل هذا الشخص المجلس
علشان جذيه ممكن الواحد يمتنع عن التصويت، مو علشان مافيه مرشح زين في الكويت، بس لأنه اهوا مو في دائرة المرشحين اللي مقتنع فيهم
شكرا على الموضوع
وانا اتفق مع الأخ ehlol
بس صار الغزو الله لا يعيده كل المترديه و النطيحه دخلوا علينا بإسم الدين و فرقوا بين الكويتيين السنه و الشيعه و الحضر و البدو
صارت ما عندنا سالفه الا هذا شيعي رافضي صوت ضده، و هذا حضري متحرر و مو قبلي صوت ضده! اللي يقول جذيه الحبيب توه يعرف الكويت و ما يندرى اذا يعرف اصلا تاريخ الكويتيين و الكويت او حتى اجداده عاشوا بالكويت و علموه على التسامح و ان احنا كلنا كويتيين غصبا عن اللي ما يرضى، و انا متأكد انه لو اهوا كويتي اصلي جان ما فكر بهالتفكير
حتى بالتلفزيون قاموا يسبون العائلات الكويتيه، بالله هذي ديمقراطيه ولا قلة أدب؟ وزارة الاعلام ما بقى شي ما منعته علشان ترضي النواب اللي يطالبون بهالشي بإسم الدين، و بعدين يطلع واحد من جماعاتهم و يطعن بالعائلات الكويتيه الحضريه ببرنامج و الوزاره ساكته طبعا و النواب ساكتين مدام السالفه مافيها رقص ولا بنات ولا شي يمس ربعهم ميخالف حتى لو فيها سب و تجريح بعائلات كويتيه، الكويتيين للأسف يبيلهم تعليم من يد و يديد علشان يصحون و ما يتبعون كل كلمه تكتبها جريدة تبي تترزق على ظهورنا و كل واحد حطله لحيه ولا لبس غتره و عقال و قال انا وطني صدقوني، و نحتاج انه نسكت كل شخص يتطرق حق سالفة القبائل ضد العائلات و السنه ضد الشيعه و البدو ضد الحضر، اللي يبي يقول انا اصلي سعودي و اصلي عراقي و اصلي ايراني و يدندن على هالسالفه هذا ما عنده روح الوطنيه و لي الحين ما استوعب انه عنده الجنسيه الكويتيه، اللي يحب الكويت و ولاءه للكويت ينسى اصل اجداده و يقول انا كويتي، مو اصلي سعودي و زبيري و ايراني الخ! واللي عاجبه اصله زياده عن اللزوم ليش ماخذ الجنسيه؟ جان ظليت على اصلك و فكيت العالم من الصيحه، بس النعره القبليه و الطائفيه متمسكين فيها، احترموا الكويت اللي قاعدين تاكلون من خيرها، مو معقول اللي قاعد يصير
with you all the way long .. inshala we will MAKE a difference ..
انشالله بنغير وبتتغير بإذن الله
ومادري هل لي الحق ان اذكر شعار حمله لاحد المرشحين وايد عاجبني
"إياك واليأس من وطنك"
وهم ارد واقول بنغير
والله كريم
اي عفوا ترى اخذت صورة الشريطه وحطيتها بمدونتي لاجل التغيير وشكرا
كلام جميل
وفكره أجمل
والسؤال
هل يتوفر البديل ؟
ماتوقع
مع هذا أنا مع التغيير.
الصوت مو امانه؟؟؟
انا اخاف ان اضيع هالامانه على احد ما يستاهل..وانا فعلا شايف ان مافيه احد يستاهل بتقولون شدراك بقولكم مرونا الدوانية وكل واحد نفس النغمه...مافيه شي يديد..فحرام اني اضيع هالامانه على احد مو كفو
starbucksq8.net
en shahad hatha fa yshhad 3ala 7bkom ltrab hal dera,
kathar alh min amthalkom
juventina
alhom amen
anon#1
thank you, thats exactly what we're aiming for, hope, for a better kuwait
anon#2
we'll do it, enshalh
بـنـت بـطنـهـا
exactly, قواج الله
ehlol
صح لسانك يا خوي . واحنا هذا اللي بنسوي ، بنرد الكويت مثل ما كانت نبي الناس ترجع مثل اول على قلب واحد . كلنا فيها السني والشيعي والبدوي والحضري والاسلامي واللبرالي .. ؛لنا بنقول بنغيّر
مشكور ما قصرت
بوصالح
ويطول عمرك ، تسلم
anon#3
تسلم ياخوي، ما تقصر .. هذا ان دل فهو يدل على حبك لتراب هالديره وغيرتك عليها .. كثر الله من امثالك
وبالنسبه للصوره يطلع
The photo you were looking for has been deleted.
anon#4
اللي قدروا يسونها خمسه يقدرون يسونها وحده
ونصيحتي لك انك اتدور اكفئ واحد بالدائره عندك، لانه ياخوي جذي جذي واصلين .. يوصل احسن الشينين ولا يوصل اسوائهم
دور وانا اختك اكيد بتلاقي الزين بالدائرتك .. ولا تنسى انه الرسول قال الخير فيني وفي امتي حتى قيام الساعه
صح لسانك عالكلمه اللي قلتها .. اي والله عيب
navy girl
God bless u
kuwaitya_7saweya
هالشعار وهالشريطه وهالحمله مو لي انا ولا محسوبه على احد معيّن .. اهي من والى الكويت .. باسم شبابها اللي اهم انا وانتي وغيرنا من اللي يغارون على هالديره .. فأكيد يحقلج وانا اختج .. يحق حق اي واحد تهمه مصلحت البلد
الأندلسي
شلون يعني يتوفر البديل؟
krakatoa
يمكن يكون عدل كلامك .. بس ياخوي ١٠ نواب بيوصلون من دائرتك ، رضيت وان رضيت واصلين واصلين .. فخل يكون لك دور بانك توصل احسنهم ولا انه يوصل الشين فيهم
واحنا بعد ان شاء الله وياكم
قلبا وقالبا
www.mamsha.com
من الواضح الحملة موجهة
http://www.binghayir.org/Site/%D9%85%D9%86%D9%88_%D8%A7%D9%84%D8%A3%D9%83%D9%81%D8%A3_%D8%9F_.html
اسف لكنها الحقيقة ..
وسلم لي على التغيير :)
اخي الكريم ،
هالصفحه انحطت عشان تفيد الناخبين وتفيد التغيّر
وبعدين احنا ماراح نحط اي احد الا بوجود اسباب منطقيه لاختياره .. ماراح نجيب شي من الفضاء .. بنشوف منو عنده وعي من عنده منطق منو عنده فكر منو عنده برنامج انتخابي يفيد البلد منو عنده التغيّر
ماراح نتبع تيار معيّن او طائفه معينه .. ماراح نتبع قبيله معينه او عائله .. بنتبع التغيّر .. بنتبع اللي يفيد هالبلد .. منو ما كان يكون
وجان عندك اقتراحات .. لا تبخل جزاك الله خير بس لو سمحت اذكر السبب .. شمعنه هالمرشح بالذات؟ شنو برنامجه؟ شنو فكره؟ شراح يقدم؟ شراح يسوي ؟
وصدقني ياخوي اذا كانت مقترحاتك منطقيه .. توافق المعايّر اللي ذكرنها .. توافق التغيّر
فبنحطا ! منو ما كان يكون
الله يعطيكم العافية على هالموضوع الحلو و ان شالله الكل يتأثر و يطبقه
عشان مصلحة ديرتنا الغالية و تسلمون
على الرغم من اختلافي الكلي مع فؤاد الا ان الحكمة قد تأتي من اشكاله..
بالفعل نريد التغيير
بالفعل البلد محتاجة جهود شبابها
بالتوفيق
و انا.. هم معاكم
q8-manal
يسلمج ويعافيج .. انشالله بحيل الله بنغيّر
mak
عدل كلامك ياخوي .. جزاك الله خير
اي نعم نبي التغيير ، معاكم قلبا و قالبا مللنا التمثيل و مللنا المنافقين و مللنا المتسلقين اللذين يستترون بعباءة الدين و يعملون لمصالح أحزابهم السياسية ذات الولاء الخارجي
كفو
مداخلتكم اليوم .. اثبتت وأكدت ان هالحملة عشان البلد ..
قواكم الله .. ويعطيكم العافية ..
الحمدالله .. يقويك ويعافيك .. مشكور
Post a Comment